Manoloana ny zava-mitranga eto amin’ny FIRENENA – nanomboka omaly Alakamisy atoandro sy alina ka hatramin’izao ora hivoahan’ity fanambarana ity izao – izay anehoan’ny vahoaka ny tsy fahazakany intsony ny zavatra mihatra aminy ara-pihariana sy ara-piaraha-monina, andaniny, ny fandrobana sy ny fandoroana fananan’olona ho fandotoana sy ho fanasoketana ny hetsika am-pilaminana nataon’ny vahoaka, ankilany, ny BIRAO FOIBE, izay nivory maika tsy ara-potoana androany, dia manao izao fanambarana izao:
- Ny FI.SE.MA. dia manameloka tanteraka ny fandrobana sy fandoroana fananan’olona, na inona na inona antony, ary miantso ny tompon’andraikitra mpiaro ny olona sy ny fananany hanao sava hao ireo mpandroba sy mpandoro fananan’olona ka hampihatra ny famaizana tandrify an’izany;
- Izao hetsi-bahoaka saika manerana ny renivohi-paritra izao dia fanehoany ny tsy fahafaliany manoloana ny fitotonganan’ny farim-piainany nateraky ny faharatsiam-pitantanan-draharaham-pirenena, izay efa nanaovan’ny vondrona sy sokajin’olona isan-karazany fanairana mivantana na an-kolaka, saingy tsy nasian’ny Mpitondra lanjany loatra sy nataony an-kilabao ;
- Ny FI.SE.MA. dia manantitra ary mampatsiahy ombieny ombieny fa ny FAHANTRANA SY NY FAMPAHATRANA ARY NY TSY FIRINDRAN’NY FAMPANDROSOANA ISAM-PARITRA, izay tokony hiteraka fampananan’asa ho an’ny olona sy fivoaram-piainana isan-tokatrano, no tena aretina mikiky ny Firenena sy ny fiaraha-monina ka mila hitadiavam-bahaolana miaraka ka tsy haniliana sy hanavahana sokajin’olona tsy mitovy hevitra.
- Hatramin’ny Taona 2000 no mankaty – izany hoe nandritry ny 25 taona ngarandidina – dia ny LOJIKAN’NY FANGORONANA SY NY FANJAKAZAKANA no nitantanana izao tontolo izao sy Firenena Malagasy, hany ka tsy nisy mihitsy ny fandrosoan’ny daholobe, fa olom-bitsy no nitavana ny harena tsy hita pesimpesenina eto Madagasikara. Rariny araka izany raha mijoro mitaky ny anjara tandrify azy ireo ela nandeferana sy nanaovana mizana tsindrinan’ila.
- Koa, ho famerenana haingana amin’ny laoniny ny fiainam-bahoaka sy ho fisorohana ny fihombon’ny lonilon’ny samy mpiara-belona ary ho fandaminana indray ny dinam-piaraha-monina Malagasy, ny FI.SE.MA dia miantso am-panajana ireo OLON-KENDRY SY MANAM-PANAHY hijoro sy hifanantona ka hamory ireo Hery Velona mba ahafahana mitady sy mandroso vahaolana azo tanterahina sy maharitra.
Antananarivo, faha-26 SEPTAMBRA 2025
Amin’ny anaran’ny FI.SE.MA.
NY BIRAO FOIBE